Actualidade

Arredor de 36.500 persoas recibirán nas súas contas bancarias unha axuda de 218 euros nun único pago anual. A Xunta destina 8 millóns de euros a esta prestación complementaria, que se abona de oficio sen necesidade de solicitude.

Santiago de Compostela, 4 de marzo de 2025. O Diario Oficial de Galicia (DOG) publica hoxe o decreto que regula o pagamento dunha axuda complementaria ás persoas que perciben unha prestación non contributiva. A Xunta de Galicia destina 8 millóns de euros para ingresar de oficio este complemento extraordinario de 218 euros ás persoas beneficiarias de pensións de xubilación e invalidez en modalidades non contributivas, así como ao subsidio de garantía de ingresos mínimos.

Este complemento abonase nun único pagamento anual, que se ingresa automaticamente nas contas bancarias das persoas beneficiarias sen necesidade de que o soliciten nin de realizar ningún trámite. Os únicos requisitos que deben cumprir son ter residencia habitual en Galicia e estar en alta na nómina da pensión ou subsidio o 1 de xaneiro de 2025.

Galicia é unha das poucas Comunidades Autónomas que concede esta axuda extraordinaria de xeito ininterrompido dende o ano 2008, a pesar de que non é obrigatoria, pois depende da decisión dos gobernos autonómicos. Ademais, mantense o adiantamento do pagamento, como se fixo dende 2023, xa que anteriormente esta axuda ingresábase a finais de cada ano.