O ensino concertado galego afronta unha nova xornada de folga ante a falta de negociación coa Consellería
Os sindicatos do ensino concertado de Galicia volverán mobilizarse este martes, 6 de outubro, cunha nova xornada de folga para reclamar á Consellería de Educación a apertura inmediata dun proceso de negociación que permita abordar as cuestións pendentes no sector. Trátase da segunda xornada de paro convocada neste inicio do curso 2026/2027.
A mobilización estará acompañada dunha manifestación en Santiago de Compostela, que comezará ás 11.30 horas na Alameda e rematará diante de San Caetano, sede da Consellería de Educación. As organizacións sindicais sinalan como principal motivo da protesta a falta de vontade da Administración para establecer un calendario de negociacións.
Entre as demandas do persoal figura a convocatoria inmediata da Mesa Tripartita do ensino concertado e a posta en marcha de negociacións sobre os asuntos que permanecen sen resolver, así como a elaboración dun calendario para os próximos anos que permita concretar os acordos pendentes.
Os sindicatos reclaman tamén o desbloqueo dos acordos de homologación salarial e desenvolvemento profesional, con medidas como o pagamento dos complementos por coordinación, titorías ou dinamización lingüística, os complementos asociados aos cargos e a recuperación da paga extraordinaria de antigüidade. A redución da carga lectiva e a mellora das condicións da xubilación parcial con contrato de relevo, estendéndoa a todo o persoal, forman parte igualmente das reivindicacións.
Outra das peticións é a creación dun complemento autonómico destinado ao persoal de administración e servizos (PAS), co obxectivo de mellorar as súas condicións laborais.
As organizacións sindicais consideran que a situación require unha resposta inmediata por parte da Consellería e advirten de que non é asumible continuar adiando cuestións que levan anos pendentes. Ao seu xuízo, o bloqueo da negociación está contribuíndo a incrementar o malestar entre os profesionais do sector.
Os representantes dos traballadores defenden que demostraron a súa disposición ao diálogo, pero consideran que para que este sexa posible é necesaria a vontade da Administración de sentarse a negociar. Neste sentido, lembran que, a pesar das mobilizacións realizadas durante o pasado curso, a Consellería non convocou a Mesa Tripartita nin respondeu aos escritos remitidos polas organizacións sindicais.
O ensino concertado representa, segundo os sindicatos, arredor dun terzo da educación en Galicia. O sector conta con aproximadamente 7.000 profesionais, que atenden ao 30% do alumnado galego das etapas non universitarias. As organizacións denuncian que mentres aumentan as obrigas e a carga burocrática do persoal, as melloras nas súas condicións laborais continúan pendentes e afastadas das existentes noutros ámbitos educativos.