O festival The Wild celebra en Vigo unha nova edición de música, cine e natureza co apoio da Xunta
O festival The Wild presentou en Vigo a súa sétima edición, que se celebrará do 5 ao 7 de setembro no parque forestal de San Miguel de Oia. O evento, de carácter multidisciplinar e familiar, combina concertos, cine e actividades na natureza, e conta co apoio da Xunta de Galicia.
Na presentación participaron o director da Axencia Galega das Industrias Culturais (Agadic), Jacobo Sutil, a delegada territorial da Xunta en Vigo, Ana Ortiz, a vicepresidenta da Deputación de Pontevedra, Luisa Sánchez, e o representante da organización, Juan de Castro.
Sutil destacou que The Wild é un dos festivais beneficiados polas subvencións da Consellería de Cultura, Lingua e Xuventude a festivais profesionais de música, destinadas integramente á contratación de artistas galegos. Nesta edición, pasarán polo seu escenario Sr. Salvaje, Netta Rufina, Los Mortymer, Supergigante, Exeria, Gargantúa e Martin Human, con Ilegales como único cabeza de cartel non galego. Ademais, o concurso Salvaxesons repartirá ata 1.800 € en premios para recoñecer o talento musical emerxente.
O programa inclúe tamén o ciclo The Wild Cine, actuacións de Cé Orquestra Fantasma e Peter Punk Payaso, as inéditas Olimpiadas Pallasas, unha andaina guiada e a gincana Orientaventura, actividades que buscan poñer en valor o espazo natural de San Miguel de Oia.
The Wild caracterízase pola súa aposta pola sustentabilidade, o consumo local e a participación comunitaria, en colaboración coa veciñanza e a comunidade de montes. Ademais, intégrase na campaña cultural da Xunta “Para gustos, cultura”, que reúne máis de 3.400 actividades en 200 concellos galegos.