O Goberno destina 170.000 euros a 271 agricultores da provincia de Pontevedra para mitigar o custe dos insumos
O Goberno de España destina 169.901 euros a 271 agricultores e agricultoras da provincia de Pontevedra para facilitar a compra de fertilizantes e contribuír a compensar o incremento do prezo destes produtos provocado pola crise de Oriente Medio.
O Ministerio de Agricultura, Pesca e Alimentación comeza a aboar estas axudas extraordinarias, recollidas no Plan Integral de Resposta á Crise de Oriente Medio, ante o encarecemento dos fertilizantes, unha das materias primas máis afectadas polo conflito. A medida conta cunha dotación total de 700 millóns de euros en España.
Na provincia de Pontevedra, este primeiro pagamento permitirá apoiar a fertilización de 4.413,79 hectáreas de cultivo, das que 4.400,49 corresponden a secano e 13,30 a regadío.
O subdelegado do Goberno en Pontevedra, Abel Losada, destacou que esta medida “é unha mostra do compromiso do Goberno coa protección do sector primario e coa viabilidade das explotacións ante situacións internacionais que escapan ao seu control”.
Losada salientou que o apoio público permite “dar seguridade aos agricultores nun contexto de incerteza e contribuír a que as explotacións manteñan niveis adecuados de fertilización, imprescindibles para preservar o volume da produción agrícola, sen que o sobrecusto acabe repercutindo no prezo dos alimentos”.
No conxunto de Galicia, 3.299 agricultores e agricultoras están incluídos neste primeiro pagamento e recibirán 3.024.944 euros para unha superficie total de 75.425 hectáreas.
En toda España, este primeiro listado comprende 249.376 agricultores, que percibirán 494,57 millóns de euros. As contías establecidas son de ata 92,5 euros por hectárea para os cultivos de regadío e 38,33 euros por hectárea para os de secano.
O Ministerio de Agricultura, Pesca e Alimentación publicará proximamente unha segunda relación de potenciais beneficiarios destas axudas.