O Goberno do Estado impulsa con 1,7 millóns de euros a climatización renovable da Universidade de Vigo
O subdelegado do Goberno en Pontevedra, Abel Losada, destacou hoxe o compromiso do Goberno de España coa transición enerxética e a modernización das infraestruturas públicas tras a concesión de 1.718.899,71 euros para a instalación dunha rede de calor xeotérmica na Facultade de Filoloxía e Tradución da Universidade de Vigo, unha actuación que mobilizará un investimento subvencionable de 2.500.581,48 euros. A axuda forma parte do Programa de Incentivos para Redes de Calor e Frío Renovables (RENORED), impulsado polo Ministerio para a Transición Ecolóxica e o Reto Demográfico (MITECO) e financiado con fondos NextGenerationEU do Plan de Recuperación, Transformación e Resiliencia.
"A transición ecolóxica tamén pasa por modernizar os nosos edificios públicos con tecnoloxías limpas, eficientes e innovadoras. Este investimento permitirá que a Universidade de Vigo reduza a súa dependencia dos combustibles fósiles e continúe avanzando cara a un modelo enerxético máis sostible, ao tempo que demostra o compromiso do Goberno de España cunha universidade pública moderna e preparada para os retos do futuro", sinalou Abel Losada.
A actuación contempla a implantación dunha rede de calor alimentada mediante enerxía xeotérmica, unha fonte renovable que permitirá climatizar o edificio cun menor consumo enerxético e unha redución significativa das emisións de gases de efecto invernadoiro, contribuíndo ademais a mellorar a eficiencia enerxética das instalacións universitarias.
Losada puxo en valor que Galicia sexa unha das comunidades autónomas con maior número de proxectos seleccionados nesta convocatoria, con catro actuacións financiadas, o que, ao seu xuízo, "reflicte a capacidade do noso territorio para aproveitar os fondos europeos en proxectos que melloran os servizos públicos, impulsan a innovación e aceleran a transición cara a un modelo enerxético máis sostible".
No conxunto de España, o MITECO concedeu 42,8 millóns de euros a 36 proxectos de redes de calor e frío renovables, que mobilizarán arredor de 210 millóns de euros de investimento e permitirán instalar 252,1 MW de potencia térmica renovable, evitando a emisión dunhas 12.600 toneladas de CO₂ ao ano.
O programa RENORED forma parte do capítulo REPowerEU do Plan de Recuperación, Transformación e Resiliencia e ten como obxectivo aumentar a eficiencia enerxética dos edificios e infraestruturas, fomentar o uso de enerxías renovables e reducir a dependencia dos combustibles fósiles, contribuíndo ao cumprimento dos obxectivos nacionais de descarbonización e loita contra o cambio climático.