O Goberno inviste na provincia de Pontevedra máis de 6,6 millóns para a investigación
O subdelegado do Goberno en Pontevedra, Abel Losada, destacou hoxe o investimento de 6.657.125 euros que o Goberno de España destina á provincia a través da convocatoria 2025 de Proxectos de Xeración de Coñecemento do Ministerio de Ciencia, Innovación e Universidades, a través da Axencia Estatal de Investigación (AEI). O programa permitirá desenvolver 47 proxectos de investigación nos centros da provincia e incorporar 17 contratos predoutorais asociados.
Abel Losada salientou que este investimento "reforza o compromiso do Goberno coa ciencia como un dos piares do desenvolvemento económico e social, impulsando proxectos de excelencia, favorecendo a transferencia de coñecemento e creando novas oportunidades para o persoal investigador".
A Universidade de Vigo sitúase, segundo a resolución provisional, como a principal beneficiaria da convocatoria na provincia, con 34 proxectos financiados. A resolución inclúe tamén cinco proxectos do Instituto de Investigacións Mariñas (IIM-CSIC), tres do Instituto Español de Oceanografía, un da Misión Biolóxica de Galicia (MBG-CSIC), un da Fundación Pública Galega de Investigación Biomédica Galicia Sur, un da Asociación de Investigación Metalúrxica do Noroeste (AIMEN), un do Centro Universitario da Defensa da Escola Naval Militar e un do Centro Tecnolóxico Galego de Acuicultura.
Ademais do financiamento dos proxectos, a convocatoria incorpora 17 contratos predoutorais, destinados á formación de novo persoal investigador e ao fortalecemento do relevo xeracional do sistema científico.
No conxunto do país, a convocatoria mobiliza 697,6 millóns de euros, dos que 542 millóns se destinan a 3.422 proxectos de investigación e 155,6 millóns a 1.156 contratos predoutorais. Trátase da convocatoria con maior dotación económica da súa historia e supón un incremento do 4,5 % respecto á edición anterior.
"Cada novo proxecto de investigación representa unha oportunidade para xerar coñecemento, atraer talento e transformar ese coñecemento en innovación e progreso. A provincia de Pontevedra conta cun ecosistema científico de referencia e o Goberno de España seguirá apoiándoo con investimentos récord", concluíu o subdelegado.