Actualidade

O novo contrato de transporte público urbano de Vigo terá unha duración de nove anos, cun orzamento medio anual de 21,6 millóns de euros, e aposta pola electrificación da frota e a mellora da cobertura do servizo.

A Xunta de Goberno Local do Concello de Vigo aprobou este luns a licitación do servizo de transporte público urbano de viaxeiros para os próximos nove anos, coa posibilidade dunha prórroga adicional dun ano. O contrato contará cun importe de 195,9 millóns de euros, o que supón unha media anual de 21,6 millóns de euros, e prevese que entre en vigor no segundo semestre de 2026.

O alcalde de Vigo, Abel Caballero, definiu a licitación como “un contrato para unha gran mellora do transporte urbano na cidade”, destacando que o importe total do servizo, incluíndo as tarifas aboadas polas persoas usuarias, ascenderá a 468,6 millóns de euros durante todo o período de vixencia.

Segundo explicou o rexedor, trátase dun contrato de servizos cun novo modelo de xestión, que garante unha prestación directa á cidadanía e unha contorna de control dirixida desde o Concello a través dun xestor especializado. O obxectivo principal é priorizar a demanda cidadá, mellorando a eficiencia do sistema e ampliando a cobertura do transporte urbano en toda a cidade.

O contrato inclúe un investimento de case 70 millóns de euros, destinado á renovación da frota con 55 novos vehículos —41 eléctricos e 14 híbridos enchufables—, á reforma integral das cocheiras para a súa electrificación e á incorporación de novas tecnoloxías, como a intelixencia artificial e o big data, para optimizar a xestión do servizo, axustar a oferta á demanda e mellorar a experiencia das persoas usuarias.

Ademais, potenciarase a xestión a través da tarxeta PassVigo, que continuará a ser unha peza clave no acceso ao transporte público municipal. O Concello aprobará tamén unha ordenanza específica que regulará as tarifas do servizo, tendo en conta os diferentes perfís de persoas usuarias, e que incluirá a xestión do bus turístico.

Abel Caballero lembrou que Vigo vén experimentando nos últimos anos unha transformación urbana sen precedentes, con actuacións como as grandes humanizacións e o proxecto Vigo Vertical, que incorporou ramplas, ascensores e escaleiras mecánicas e redefiniu o modelo de mobilidade da cidade.

Neste contexto, o alcalde subliñou que o novo contrato permitirá avanzar cara a un modelo de transporte urbano dinámico, centrado na demanda cidadá, apoiado nas novas tecnoloxías e plenamente aliñado coa transición cara á sostibilidade ambiental grazas á renovación da frota.