Actualidade

O PSdeG alertou no Parlamento galego do aumento da externalización de servizos do Sergas e das derivacións de pacientes a hospitais privados. A deputada Elena Espinosa reclamou un sistema rigoroso de control e avaliación dos concertos sanitarios para garantir a calidade asistencial.

A portavoz socialista de Sanidade no Parlamento galego, Elena Espinosa, denunciou este martes no Pleno a “crecente externalización de servizos” por parte do Sergas, unha tendencia que, segundo advertiu, vai acompañada dun incremento das derivacións de pacientes a centros hospitalarios privados.

A deputada do PSdeG alertou do impacto que esta dinámica pode ter sobre a capacidade da sanidade pública galega e reclamou á Xunta que garanta á cidadanía o acceso a unha atención sanitaria “de igual calidade, independentemente de quen execute a prestación”.

“Non podemos ignorar que experiencias doutros territorios nos teñen que servir de advertencia”, sinalou Espinosa, en referencia aos problemas detectados noutros sistemas sanitarios, como o cuestionamento das listas de espera, os criterios de derivación, as cargas de traballo, a falta de transparencia na xestión ou as alertas de malas praxes que, segundo indicou, poderían comprometer a saúde dos pacientes. A este respecto, citou o caso dun hospital do Grupo Ribera en Madrid.

Nunha pregunta parlamentaria, a deputada socialista explicou que Galicia conta con dous concertos substitutorios do total de seis existentes en España, sendo —puntualizou— a única comunidade autónoma nesta situación. Ademais, indicou que outros sete territorios dispoñen de concertos parciais. Por este motivo, Espinosa considerou “imprescindible” abordar a situación dos concertos sanitarios en Galicia “con claridade”.

Neste senso, reclamou unha comparecencia monográfica do conselleiro de Sanidade para que ofreza “explicacións con gran detalle” sobre a política de concertación sanitaria. “É obrigación da Administración garantir que toda prestación financiada con recursos públicos cumpra cos estándares de calidade e seguridade”, advertiu.

Finalmente, Espinosa esixiu a implantación “dun sistema rigoroso de control e avaliación” que asegure que a calidade asistencial “non se resinte nin se dilúe” cando se contratan servizos a terceiros, algo que considerou especialmente necesario no ámbito sanitario.