O Grupo Socialista esixe un novo Plan de Saúde Mental con reforzo de recursos e prevención do suicidio
A portavoz de Sanidade do Grupo Socialista no Parlamento de Galicia, Elena Espinosa, presentou hoxe unha batería de iniciativas para instar á Xunta a poñer sobre a mesa un novo Plan de Saúde Mental que refuerce o persoal e os recursos públicos, con atención prioritaria á prevención do suicidio.
Espinosa advertiu que “Galiza vive a tormenta perfecta: recortes sistemáticos e falta de contratacións que deixaron baleiras as consultas de saúde mental”, mentres a comunidade lidera os datos de suicidio e de consumo de psicofármacos en menores (incremento do 52 %).
A socialista denunciou que “o orzamento para saúde mental aprobado non se executa” e que os galegos agardan máis de 5 meses para unha primeira cita. “Os galegos precisan xa un psicólogo ou un psiquiatra que os atenda a tempo: non se substitúe a atención por ansiolíticos”, proclamou.
Entre as medidas esixidas destacan:
Incremento inmediato de psicólogos e psiquiatras clínicos en todas as áreas sanitarias.
Priorización da prevención do suicidio con servizo de apoio 24/7 para persoas en risco.
Seguimento periódico dos pacientes e protocolos claros de derivación.
Plan estratéxico a curto, medio e longo prazo, inspirado en modelos nórdicos, que integre atención primaria, hospitalaria e comunitaria.
“O dereito á saúde inclúe tamén a psiquiatría e a psicoloxía: non hai igualdade no acceso se faltan profesionais”, concluíu Espinosa, advertindo que, se a Xunta non actúa “o sufrimento continuará crescendo”.