O Nadal de Vigo terá case 12 millóns de luces led e medrará a 460 rúas
O Nadal de Vigo xa comezou a tomar forma coa instalación da iluminación, que este ano contará con case 12 millóns de luces led repartidas en 460 rúas, 40 máis que o ano anterior. O alcalde, Abel Caballero, achegouse este mércores á Porta do Sol para dar comezo oficialmente á montaxe, que correrá a cargo da empresa Ximénez.
Entre as novidades desta edición está a ampliación da iluminación a novas zonas da cidade, como Vialia, Urzáiz e Bouzas, así como a incorporación de 7.000 motivos ornamentais que encherán Vigo de cor e luz durante as festas. “Todo está medido, estudado e planificado. Non hai improvisación. Xa estamos a traballar nos Nadal de dentro de dous e tres anos”, indicou Caballero.
Ademais, o rexedor anunciou que este ano se mellorará a experiencia turística mediante rutas planificadas, adaptadas aos días de estancia dos visitantes.
O día do acendido das luces continúa a ser un segredo, pero Caballero asegurou que esta edición será “a mellor da historia de Vigo” e que volverá marcar “o inicio do Nadal en todo o planeta”.
O alcalde puxo en valor o efecto contaxio desta celebración: “Agora todas as cidades celebran o Nadal con luces e iso é un orgullo para Vigo”, declarou.
En canto ao impacto económico, prevé que se pulverice o récord de visitantes do pasado ano, que foi de 6,3 millóns de persoas, grazas a unha mellor conectividade ferroviaria e ao turismo procedente de toda Galicia e do norte de Portugal. O retorno económico estimado supera os 800 millóns de euros. “E hai algo incalculable: o valor da imaxe de marca que xeramos en Vigo co Nadal”, concluíu.