O Parlamento aproba unha proposta para esixir á Xunta que garanta a apertura ao público dos Bens de Interese Cultural
A Comisión de Cultura do Parlamento de Galicia aprobou hoxe unha proposición non de Lei impulsada polo Grupo Socialista que insta á Xunta a garantir o cumprimento da normativa que regula a apertura ao público dos Bens de Interese Cultural (BIC). A portavoz de Cultura do Grupo Socialista, Silvia Longueira, criticou a falta de actuación do goberno galego neste aspecto e esixiu que faga cumprir a Lei do Patrimonio Cultural de Galicia.
Esta norma establece que os monumentos declarados BIC deben estar dispoñibles para a súa visita gratuíta polo menos catro días ao mes. Sen embargo, Longueira denunciou que “non somos capaces de que a Igrexa nos diga onde, cando e como podemos visitar” os bens culturais que xestionan.
A parlamentaria socialista reclamou que a Xunta asuma as súas responsabilidades e vixíe que os propietarios destes bens cumpren cos seus deberes. "Se hai un BIC e os seus propietarios reciben determinadas exencións, tamén teñen obrigas que deben cumprir, e se non o fan, será porque ninguén llo esixe", afirmou.
En Galicia hai actualmente 783 Bens de Interese Cultural, dos cales 110 foron declarados desde 2016. Por iso, Longueira pediu que o goberno galego non só asegure a súa apertura, senón que tamén fomente o coñecemento e a difusión do patrimonio cultural galego entre a cidadanía.
A iniciativa aprobada inclúe tres puntos clave:
- Supervisar que os titulares dos BIC cumpren coa obriga de abrir os monumentos catro días ao mes.
- Promover o coñecemento do patrimonio galego.
- Planificar accións para difundir e poñer en valor os BIC con menor visibilidade.