O Parlamento pide impulsar a formación en apicultura na Escola Agraria de Becerreá
O Parlamento de Galicia aprobou por unanimidade unha iniciativa do Grupo Parlamentario Popular para impulsar a formación especializada en apicultura na Escola Agraria de Alta Montaña Pena do Pico, en Becerreá, co obxectivo de contribuír á mellora da produción de mel e doutros produtos derivados da actividade apícola.
A deputada popular Encarna Amigo defendeu que reforzar a formación dos profesionais pode contribuír a incrementar a competitividade do sector. "Formar mellor aos nosos apicultores significa tamén facer máis competitivo o sector", afirmou, ao tempo que destacou a experiencia previa do centro de Becerreá no ámbito formativo.
Segundo explicou, a proposta pretende dar continuidade a unha liña de traballo xa existente e aproveitar as capacidades do Centro de Formación e Experimentación Agroforestal (CFEA) de Becerreá para avanzar progresivamente cara a unha maior especialización en apicultura. Amigo considerou que o centro podería chegar a converterse nun referente nesta materia dentro da rede galega de formación agraria.
"Na Montaña de Lugo non partimos de cero", asegurou a deputada, que destacou as condicións e o potencial do territorio para desenvolver unha oferta formativa vinculada á actividade apícola. Neste sentido, apuntou que Becerreá "ten condicións, experiencia e potencial para avanzar cara a unha maior especialización apícola".
A iniciativa fai referencia ao Certificado Profesional de Apicultura AGAN0211, de nivel 2 e integrado na familia profesional agraria, que inclúe formación relacionada directamente coas actividades profesionais do sector. Ademais, segundo sinalou Encarna Amigo, o Plan Estratéxico da Formación Agraria en Galicia xa contempla este certificado entre as posibilidades formativas para Becerreá.
A deputada puxo tamén como exemplo o CFEA Pedro Murias de Ribadeo, que, segundo indicou, demostra como adaptar a oferta formativa ás características e oportunidades de cada territorio pode favorecer unha resposta positiva. "Este é o criterio que debemos aplicar tamén en Becerreá, adaptándoo á súa propia realidade", sinalou.
Desde o Grupo Popular defenden que o reforzo da formación agraria pode contribuír á profesionalización das explotacións, favorecer o relevo xeracional e xerar novas oportunidades de emprego e actividade económica no medio rural.
"Formar, profesionalizar e diversificar o noso medio rural é tamén investir no seu futuro", concluíu Encarna Amigo.