O paro de xullo en Galiza golpea ás mulleres de 30 a 44 anos no sector Servizos
O mes de xullo pechouse en Galiza cun total de 107.858 persoas desempregadas, o que supón 604 máis que no mes anterior. O paro subiu en todas as provincias, especialmente na Coruña, e sobre todo nos sectores de Servizos (+860 persoas, +1,1%) e Industria (+49 persoas, +0,5%). A situación máis preocupante dáse entre as mulleres de 30 a 44 anos, cun incremento do desemprego que agranda a fenda laboral existente.
O secretario confederal de Emprego da CIG, Francisco González Sío, advertiu de que estas cifras confirman a dependencia da economía galega de sectores precarios, sen recuperación da actividade industrial. “Seguimos baseando todo o emprego na hostalería e no comercio, consolidando un modelo laboral inxusto, estacional e discriminatorio”, sinalou.
Un de cada catro empregos está vinculado ao comercio, o que, segundo Sío, “leva a un empobrecemento progresivo, cun desemprego estacional e estrutural crónico”. Tamén denunciou que a oferta laboral non cumpre as expectativas dunha clase traballadora sobrecualificada, con precariedade e salarios cada vez máis baixos desde 2021.
Aumento da temporalidade
En xullo rexistráronse 86.000 contratos, dos que 62.000 foron temporais, e un récord de 48.500 contratos por circunstancias da produción. Para Sío, isto evidencia que “moitas persoas seguen encadeando contratos de días, semanas ou poucos meses, igual ca antes da reforma laboral”.
Criticou que a reforma laboral non eliminou a temporalidade e que o despedimento de persoas con contrato indefinido é agora máis barato, polo que “ter un contrato indefinido xa non garante estabilidade laboral”.
Impacto nas mulleres
O paro aumentou especialmente entre as mulleres, no sector servizos e entre as maiores de 44 anos. “Cando a hostalería e o comercio non xeran máis emprego, este colectivo queda sen opcións noutros sectores”, denunciou.
A CIG reclama políticas activas de emprego para mellorar a empregabilidade destes colectivos, con formación e capacitación noutras áreas. “Se hostalería e comercio son os únicos sectores con ofertas, é practicamente imposible que estas persoas accedan a un emprego digno”, concluíu.