Actualidade

Os datos do paro de xuño evidencian un mercado laboral galego cada vez máis precarizado e dependente do sector servizos, con contratacións estacionais e baixa calidade do emprego.

A hostalaría e o comercio concentran a maior parte das novas afiliacións, mentres cae o emprego no sector primario

Os últimos datos do paro do mes de xuño, publicados polo SEPE, confirman unha tendencia preocupante no mercado laboral galego: unha crecente dependencia do sector servizos e unha elevada taxa de contratación temporal. Segundo os rexistros da Seguridade Social, das 7.844 novas altas no sistema, o 78% foron contratos temporais, moitos deles vinculados á hostalaría e ao comercio.

Estes dous sectores acaparan xa unha de cada tres e unha de cada catro novas afiliacións respectivamente, o que para a CIG representa un síntoma claro da precariedade laboral que se está asentando na economía galega. “Trátase dos sectores con peores condicións e salarios máis baixos”, advertiu Paco Sío, secretario confederal de Emprego da central sindical.

A distribución das novas afiliacións mostra que Pontevedra lidera o aumento con 4.065 novos rexistros, seguida da Coruña, Lugo e Ourense. Por sectores, só o servizos (+6.419) e a industria (+1.032) medran, mentres que o sector primario continúa en retroceso, con 19 afiliacións menos. A CIG denuncia que este declive está vinculado ás políticas da Xunta, centradas na eucaliptización e nos proxectos contaminantes como o de Altri.

Desde a central sindical reclaman un cambio de modelo económico que aposte pola industria e por servizos públicos fortes, alertando de que a situación actual agrava a crise social, mesmo en tempos de suposta recuperación. Tamén critican a reforma da xubilación parcial, que segundo os datos está practicamente desaparecida, dificultando o acceso á xubilación digna.