O programa +Bosques ofrece esta fin de semana rutas por Cabo Udra e a Illa de Tambo
A Deputación de Pontevedra retoma esta fin de semana as actividades do programa provincial +Bosques, que promove o contacto directo coa natureza a través dos chamados “baños de bosque”. Cada quenda contará con 15 participantes, gozando dunha experiencia sensorial e de conexión coa natureza.
O sábado 16 de agosto desenvolveranse dúas quendas en Cabo Udra, en Bueu, percorrendo parte da Costa do Morrazo e espazos da Rede Natura 2000 con vistas á Ría de Pontevedra e á Illa de Tambo. O domingo 17 de agosto, outras dúas quendas terán lugar na Illa de Tambo, en Poio, onde, a pesar da presenza de eucaliptos e acacias, destaca un valioso patrimonio natural e histórico, con formacións como taffonis, dunas e a Praia Area Grande, ademais do peirao, faro, lazareto e antigo albergue.
As prazas para todas as rutas de agosto están completas, esgotándose poucas horas despois de abrirse a inscrición. O prazo para as rutas de setembro abrirá o 25 de agosto ás 9:00 horas.
O programa deste ano inclúe sete espazos naturais: a Ruta do Xabriña (Covelo), a Ruta da Pedra e da Auga (Meis), O Carreirón (A Illa de Arousa), Cabo Udra (Bueu), o Pazo de Lourizán (Pontevedra), a Illa de Tambo (Poio) e o río Eifonso (Vigo). A Deputación duplicou a oferta de percorridos, combinando localizacións de costa e interior para descubrir ecosistemas de gran biodiversidade.
As actividades combinan exercicios sensoriais, físicos e psicolóxicos para favorecer a conexión co medio natural, estimular os sentidos e fomentar o coidado do patrimonio ambiental.