O PSdeG acusa a Rueda de chegar “tarde e mal” ás crises e de gobernar sen iniciativa
O PSdeG-PSOE denunciou que o presidente da Xunta de Galicia, Alfonso Rueda, chega “sempre tarde” á xestión das principais crises que afectan a Galicia e acusouno de gobernar “sen iniciativa propia”.
O Grupo Parlamentario Socialista sinala que o último Consello da Xunta volve evidenciar esta situación, ao non presentar medidas propias fronte a tres problemas clave: a crise internacional derivada da guerra, a planificación contra incendios e a situación do marisqueo.
Sen medidas propias ante a guerra
No relativo ao impacto da guerra en Oriente Próximo, o PSdeG critica que Rueda se limitase a cuestionar a falta de consulta por parte do Goberno de España, sen propoñer ningunha medida para Galicia.
Os socialistas lembran que o Executivo central aprobou un plan de choque de 5.000 millóns de euros, mentres que a Xunta non presentou iniciativas propias para paliar os efectos económicos.
Retraso no plan contra incendios
Outra das críticas céntrase no Plan de prevención e defensa contra incendios forestais (Pladiga), que, segundo o PSdeG, foi presentado con cinco meses de atraso respecto ao prazo legal.
A formación socialista advirte de que este atraso implica falta de planificación preventiva, coordinación e contratación de persoal, o que pode aumentar o risco ante a tempada de incendios.
Ademais, cuestiona que as medidas presentadas, como o uso de drons, cámaras ou aplicacións móbiles, resulten insuficientes sen unha planificación a tempo.
Crise do marisqueo
No ámbito do marisqueo, o PSdeG denuncia que a resposta da Xunta chega tarde ante unha situación que se arrastra desde finais de 2023.
Segundo sinalan, tras meses de advertencias por parte do sector, o Goberno galego anunciou agora un paquete de 22,7 millóns de euros que consideran “insuficiente”.
Os socialistas lembran que as confrarías e profesionais reclamaban medidas máis urxentes, como axudas directas, prórrogas automáticas dos permisos ou un seguro público de produción.
Chamamento a actuar
Para o PSdeG, o patrón é claro: “Rueda chega sempre tarde e mal aos problemas da cidadanía”.
Por iso, instan ao presidente da Xunta a abandonar a “política do escaparate” e a adoptar medidas reais e inmediatas fronte ás crises actuais, tanto no ámbito económico como no medioambiental e no sector primario.