O PSdeG acusa a Rueda de rexeitar fondos estatais e acudir ao Debate da Autonomía sen proposta de financiamento
O PSdeG acusou ao presidente da Xunta, Alfonso Rueda, de acudir ao Debate do Estado da Autonomía sen unha proposta propia en materia de financiamento autonómico e de rexeitar recursos ofrecidos polo Goberno central.
A deputada socialista Patricia Iglesias criticou que o Executivo galego estea a bloquear o debate ao non participar nas negociacións, asegurando que esta decisión responde á estratexia do Partido Popular a nivel estatal.
Iglesias sinalou que o Goberno de España puxo enriba da mesa unha proposta inicial de 587 millóns de euros para Galicia, que, segundo indicou, debe entenderse como un punto de partida para negociar un novo modelo de financiamento que teña en conta as particularidades da comunidade.
Neste sentido, lembrou factores como o envellecemento da poboación, a dispersión territorial ou a despoboación como elementos clave que deben incorporarse a esa negociación.
A deputada tamén puxo o foco na proposta de condonación de 4.000 millóns de euros de débeda, que cualificou como unha oportunidade para liberar recursos que poderían destinarse a reforzar servizos públicos como a sanidade, a educación ou a dependencia.
Segundo explicou, a débeda galega supera actualmente os 12.000 millóns de euros, cun custo anual en xuros significativo, polo que considerou “difícil de entender” o rexeitamento desta medida.
O PSdeG denunciou ademais o que considera unha “contradición” do Goberno galego, ao reclamar máis financiamento ao Estado mentres reduce os seus propios ingresos mediante bonificacións fiscais. Segundo indicou, os orzamentos de 2026 inclúen rebaixas fiscais cun impacto de 797 millóns de euros que benefician a unha parte minoritaria da poboación.
A formación socialista subliñou que o financiamento autonómico é clave para garantir o funcionamento dos servizos públicos e avanzou que levará ao Debate da Autonomía propostas centradas en mellorar os recursos dispoñibles, aceptar a quita de débeda e avanzar cara a unha política fiscal máis equilibrada.