Actualidade

Carmen R. Dacosta critica que o Pladiga segue sen aprobar e advirte de que o propio borrador prevé máis hectáreas queimadas.

O PSdeG denunciou que Galicia afronta o próximo verán cunha estratexia contra os incendios “caducada” e cun plan que, segundo sinalan, xa asume un incremento das hectáreas queimadas.

A deputada socialista Carmen Rodríguez Dacosta criticou que o Plan de Prevención e Defensa contra Incendios Forestais (Pladiga) de 2026 continúa sen aprobarse, malia que a normativa establece que debería estar publicado antes do 31 de outubro do ano anterior. A Xunta presentou un borrador o pasado 23 de marzo, pero sen aprobación definitiva.

Segundo Dacosta, este documento xa prevé que ardan ata 29.200 hectáreas, fronte ás 18.500 recollidas no plan anterior. “Non planifican e polo tanto xa saben que isto irá a peor”, advertiu.

A parlamentaria afirmou que a situación responde a un modelo baseado na reacción e non na prevención. “Os expertos levan anos advertindo de incendios de quinta e sexta xeración, fóra de toda capacidade de extinción, e a Xunta segue chegando tarde”, sinalou.

Neste sentido, rexeitou explicacións baseadas no “terrorismo incendiario” ou no comportamento da poboación e apuntou a causas estruturais como o abandono do monte, a falta de ordenación forestal e o déficit de políticas preventivas.

Dacosta tamén lembrou que o Ditame parlamentario aprobado en 2018, tras a vaga de lumes de 2017, incluía 123 recomendacións en materia de prevención, extinción e ordenación forestal, das cales “a inmensa maioría non se executaron”.

Así mesmo, criticou que a lei integral contra incendios anunciada pola Xunta en 2017 segue sen aprobarse sete anos despois.

A deputada socialista esixiu medidas como reforzar a prevención durante todo o ano, cumprir cos prazos administrativos, deixar de trasladar competencias aos concellos e desenvolver plans de ordenación forestal.

Dacosta tamén puxo o foco nos datos do último ano, no que arderon máis de 120.000 hectáreas en Galicia, cun incendio en Larouco que cualificou como o máis grande da historia recente. Ademais, lembrou que se rexistraron máis de 2.200 confinamentos e 400 evacuacións.

Finalmente, advertiu de que, se non hai cambios na estratexia, Galicia podería repetir ou mesmo empeorar estes datos nos próximos anos.