Actualidade

As deputadas socialistas Carmen Rodríguez Dacosta e Silvia Longueira Castro rexistran unha pregunta parlamentaria esixindo explicacións sobre as novas dinámicas de traballo na CRTVG, que se aplicarán sen negociación previa cos traballadores e afectarán as delegacións de Coruña, Lugo, Ourense, Vigo e Madrid.

O Grupo Parlamentario Socialista denuncia na Comisión de Control da CRTVG a decisión da dirección do ente público de impoñer unha reestruturación das súas delegacións sen diálogo social e sen atender as demandas do comité intercentros, que leva sete semanas de folga. As deputadas socialistas Carmen Rodríguez Dacosta e Silvia Longueira Castro presentaron unha pregunta parlamentaria esixindo explicacións sobre esta modificación das condicións laborais.

Segundo denunciou o comité intercentros, a dirección da CRTVG convocou ao comité en plena xornada de folga para comunicar unha reestruturación dos centros de traballo na Coruña, Lugo, Ourense, Vigo e Madrid. O subdirector de informativos, Alejandro López Carballeira, explicou que as novas dinámicas de traballo consistirán en que os redactores, ata agora especializados en televisión, radio ou web, pasen a traballar de maneira indistinta nos tres soportes.

A propia dirección recoñeceu que esta transformación implicará modificacións de tarefas e horarios, afectando a estrutura organizativa, co nomeamento dun responsable por delegación para coordinar contidos e persoal. Os cambios comezarán a aplicarse progresivamente a partir do 7 de xaneiro de 2025.

Os socialistas galegos lembran que o comité intercentros leva tempo reclamando diálogo para negociar a nova clasificación profesional do persoal da CRTVG, un proceso que permanece paralizado desde xuño de 2024 e que debería ser clave para unha transformación dixital consensuada e equilibrada. No seu lugar, denuncian que a dirección está a impoñer unilateralmente novas condicións laborais, ignorando as reclamacións dos traballadores.

Ante esta situación, as deputadas socialistas esixen saber:

1. A que marco legal responde a modificación e reestruturación das delegacións anunciada pola dirección da CRTVG?
2. Se estas novas dinámicas suporán unha modificación substancial das condicións de traballo.
3. En que punto queda a información territorial con este cambio.
4. Como será a dinámica diaria de traballo e como afectará ás funcións do persoal.
5. Se este cambio nas delegacións é un paso previo para aplicar o mesmo modelo en San Marcos e na Radio Galega.
6. Se se modificarán as funcións dos redactores e locutores da Radio Galega.
7. Se haberá cambios na estrutura orgánica e nas xefaturas.

O PSdeG denuncia que esta reestruturación supón un novo golpe contra os medios públicos galegos e os seus traballadores, que seguen loitando contra a precarización e o desmantelamento do servizo público de comunicación.