O PSdeG denuncia que os orzamentos de Medio Rural para 2027 ofrecen "moito anuncio e pouco resultado"
A portavoz de Medio Rural do Grupo Socialista, Lara Méndez, criticou este martes os orzamentos da Consellería do Medio Rural para 2027, que cualificou de «moito anuncio e pouco resultado». A parlamentaria fixo estas declaracións durante a comparecencia da conselleira, María José Gómez, para presentar as contas do próximo exercicio, que, ao seu xuízo, están deseñadas «en clave de mercadeo» coa vista posta nas próximas eleccións municipais.
Méndez cuestionou o incremento de 19 millóns de euros previsto para o programa de infraestruturas e equipamentos no medio rural, ao considerar que responde a unha estratexia electoral para «ir arañando votiños», pero que posteriormente as partidas «quedan no papel e non son executadas». Segundo os datos de execución orzamentaria correspondentes ao primeiro semestre de 2026, os últimos dispoñibles, o 87 % das partidas deste ámbito permanecían sen executar.
A representante socialista tamén denunciou que o Goberno galego anuncie aumentos orzamentarios en programas fundamentais para o futuro do rural que despois apenas se traducen en investimentos reais. Como exemplo, sinalou que o programa de infraestruturas e equipamentos só alcanzara unha execución do 13 %, mentres que o destinado á fixación da poboación quedaba no 9 % e o de mellora da calidade da produción agroalimentaria, no 8,2 %. Ademais, indicou que os Plans de Mellora para a incorporación de mozos ao sector agrario nin sequera foran resoltos.
A portavoz socialista asegurou que a Consellería do Medio Rural deixou sen investir 2.278 millóns de euros desde 2009. «Os datos berran, e algúns escóitanse ata a quilómetros de distancia», afirmou, ao denunciar a distancia entre os anuncios orzamentarios e os resultados efectivos das políticas públicas.
Segundo Méndez, esta falta de execución impide dar resposta aos problemas estruturais do campo galego e contribúe a que Galicia continúe sufrindo un importante abandono de explotacións. A parlamentaria advertiu de que a falta de impulso da Consellería compromete tanto a supervivencia das actividades agrarias como a conservación do territorio.
Neste sentido, tamén criticou a ausencia dun modelo definido de prevención de incendios forestais. Méndez reprochou ao Goberno galego que siga sen aplicar as 123 medidas aprobadas en 2017 pola Comisión de Política Forestal para avanzar cara a un sistema con maior peso da prevención e menor dependencia dos labores de extinción.
A representante socialista alertou de que o abandono dos terreos favorece a acumulación de biomasa e aumenta o risco de incendios, polo que reclamou unha política forestal que permita anticiparse aos lumes e garantir unha xestión máis eficaz do territorio rural.