O PSdeG denuncia unha “criba” de mulleres na Policía Local polos requisitos físicos
A parlamentaria socialista Paloma Castro advertiu hoxe no Parlamento que os requisitos físicos impostos pola Xunta para o acceso á Policía Local provocan unha “criba” das mulleres aspirantes, reducindo a súa presenza no corpo ao 10 %. Castro criticou que as marcas esixidas nas probas de salto ou velocidade son moi superiores ás doutros territorios e próximas ás marcas de elite.
Segundo explicou, esta situación débese á ausencia dun Plan de Igualdade por parte da Xunta, que debería garantir o acceso igualitario e incorporar a perspectiva de xénero en todos os procesos de selección, tal e como recolle a lexislación vixente.
A socialista tamén denunciou a falta de criterios obxectivos na formación impartida pola Academia Galega de Seguridade Pública (AGASP), e reclamou un plan de formación estable, con titores escollidos mediante criterios claros e convalidación académica, en vez de deixar os cursos en mans de academias privadas sen control público.