Actualidade

O deputado socialista Carlos López Font reclamou á Xunta que apoie o acordo sobre vivenda que proporá o Goberno central na Conferencia de Presidentes. O PSdeG pide que Galicia asuma o 40 % do investimento e que deixe de “desleixarse” ante a crise habitacional.

O portavoz de Vivenda do Grupo Socialista, Carlos López Font, emprazou hoxe ao goberno galego a sumarse ao acordo de vivenda que proporá o Executivo central na Conferencia de Presidentes do vindeiro venres. Font reclamou que a Xunta abandone o “desleixo” dos últimos anos e asuma dunha vez por todas a responsabilidade que implica a crise de acceso á vivenda en Galicia.

O deputado socialista pediu á Xunta que apoie a proposta estatal para triplicar o investimento público neste ámbito, onde o Goberno central asumiría o 60 % e Galicia só tería que aportar o 40 %. Criticou que a Xunta executase só o 30,1 % do programa de Acceso á Vivenda o ano pasado e deixase sen executar case a metade das axudas ao Fomento da Rehabilitación.

Font defendeu tamén a proposta do Goberno de blindar de forma indefinida a cualificación das vivendas con protección pública, impedindo a súa descualificación e posterior venda no mercado libre, como fórmula para garantir o seu uso social e frear a especulación.

Ademais, reclamou a creación dunha base de datos pública e compartida entre administracións sobre os prezos da vivenda, accesible á cidadanía, para mellorar a transparencia e a eficacia das políticas públicas neste ámbito.