Actualidade

A participación foi do 4,87 % na atención hospitalaria e do 4,57 % en atención primaria, segundo os datos facilitados polo Sergas.

O seguimento da folga sanitaria de ámbito estatal convocada contra o Estatuto Marco promovido polo Goberno central acadou en Galicia un 4,59 % no turno de tarde deste xoves, segundo os datos facilitados polo Servizo Galego de Saúde.

No conxunto da actividade hospitalaria, a participación foi do 4,87 %. Nos sete grandes hospitais do Sergas, o seguimento elevouse ata o 5,85 %, mentres que nos hospitais comarcais foi do 0 %.

Por centros hospitalarios, o paro foi secundado polo 5,17 % no Complexo Hospitalario Universitario da Coruña; polo 0 % nos complexos hospitalarios universitarios de Santiago de Compostela e Ferrol; polo 12,16 % no Hospital Universitario Lucus Augusti; polo 14,29 % no Complexo Hospitalario Universitario de Ourense; polo 10,29 % no Complexo Hospitalario Universitario de Pontevedra; e polo 0,92 % no Complexo Hospitalario Universitario de Vigo.

No ámbito da atención primaria, o seguimento da folga en rexeitamento do borrador presentado polo Ministerio de Sanidad foi do 4,57 % no turno de tarde. Por áreas sanitarias, a participación foi do 1,40 % na área da Coruña e Cee; do 9,09 % na de Santiago de Compostela e Barbanza; do 5,56 % na de Ferrol; do 0 % na de Lugo, A Mariña e Monforte de Lemos; do 1,54 % na de Ourense, Verín e O Barco de Valdeorras; do 0 % na de Pontevedra e O Salnés; e do 9,57 % na área sanitaria de Vigo.

En entidades sanitarias como a Axencia Galega de Doazón de Sangue, Órganos e Tecidos (ADOS), a empresa pública Galaria e a Fundación Pública Urxencias Sanitarias de Galicia-061, o seguimento da folga no turno de tarde foi do 0 %.

Desde o Sergas sinalan que durante a xornada se garantiu a cobertura do 100 % dos servizos mínimos, asegurando a atención asistencial urxente e de emerxencias en todo o sistema sanitario público galego.