O sénior mixto de Ximnasia Pavillón, campión de España, competirá no Trofeo IFAGG en Osaka
O equipo sénior mixto de ximnasia estética de grupo do Club Ximnasia Pavillón Ourense competirá o vindeiro mes de novembro no Trofeo IFAGG, unha das competicións internacionais de maior relevancia dentro desta modalidade deportiva, organizada pola Federación Internacional de Ximnasia Estética de Grupo (IFAGG). A cita terá lugar na cidade xaponesa de Osaka.
A participación do conxunto ourensán neste torneo chega despois de que este verán se proclamase campión de España por segundo ano consecutivo, revalidando así o título acadado na edición anterior. Este resultado foi decisivo para que a federación española de ximnasia o seleccionase como representante nacional na cita de Osaka, onde competirá fronte a outras seleccións e clubs internacionais.
O equipo, formado por ximnastas da modalidade estética de grupo, encara así unha nova tempada marcada por este importante compromiso internacional, que supón un recoñecemento ao traballo desenvolvido durante os últimos cursos.
Antes de emprender esta nova etapa, as ximnastas foron recibidas no Concello de Ourense, acompañadas pola presidenta do club e a adestradora do equipo, nun acto no que se lles trasladou o recoñecemento polo resultado acadado e os mellores desexos de cara á competición en Xapón e á tempada que agora comeza.