Deportes

Na categoría sénior, Galicia logrou un total de sete medallas, con dous títulos e cinco bronces

O taekwondo galego pechou a súa participación no Open de Portugal, torneo G1 puntuable para os rankings mundial e europeo, cun balance de 20 medallas —sete ouros, dúas pratas e once bronces— e coa consecución do subcampionato por equipos na categoría júnior. A selección autonómica asinou ademais unha quinta posición na clasificación por equipos en categoría cadete, nunha competición que serviu como primeira cita internacional da tempada para moitos dos seus deportistas.

Na categoría sénior, Galicia logrou un total de sete medallas, con dous títulos e cinco bronces. Sergio Troitiño, do Mat's, proclamouse campión en +87 quilos tras superar con autoridade ao canadense Aubert Lebel, ao serbio Milos Golubovic e ao británico Canden Cunningham na final, resolvendo todos os seus combates en dous asaltos. Pola súa banda, Roi Fraga, do Número Phi, asinou un brillante debut internacional absoluto ao conquistar o ouro en -74 quilos, vencendo a cinco rivais de Estados Unidos, Turquía, Francia, Polonia e Marrocos.

Ao remate da competición, Troitiño destacou as boas sensacións tras o torneo e asegurou que agora centrará a súa preparación na concentración de Niza e no Grand Prix de Corea.

Os cinco bronces sénior foron para Helena García (Dobok), en -73 quilos; Arlet Ortiz (Mat's), en -57; Tania Castiñeira (Hebe), en +73; Iago Mallo (Tao), en -87; e Adrián Davila (Kae Sport), en -54. Todos eles alcanzaron as semifinais despois de superar varias eliminatorias fronte a rivais internacionais.

Nas categorías de formación chegaron trece das vinte medallas galegas. En júnior, Ángela Balado (Mat's), Antón Quintero (Kwon Betanzos) e Daniel Agra (Mat's) proclamáronse campións, mentres que Noa Garrido (Mat's) obtivo a prata. Os bronces foron para Lucía Golobardas (Patiño), Mario López (Patiño) e Lucas Corbacho (Taekanart), resultados que permitiron á selección galega finalizar como subcampioa por equipos, só por detrás do conxunto estadounidense CUTA e por diante da selección de Turquía.

Na categoría cadete, Alba Figueira (Boudsport) conseguiu a medalla de ouro e Noreia Vales subiu ao terceiro chanzo do podio, contribuíndo á quinta posición por equipos dunha selección galega que pechou con éxito a súa participación nun dos torneos internacionais de referencia do calendario europeo.