O Vigo Dance Festival dará visibilidade ao talento das escolas e grupos de danza da cidade
O alcalde de Vigo presentou este venres o Vigo Dance Festival, a primeira edición dun novo evento multidisciplinar que busca poñer en valor o talento das escolas, grupos de barrio e compañías profesionais de danza da cidade. O festival celebrarase os días 24 e 25 de maio no Auditorio Mar de Vigo, con entrada e participación gratuíta.
Abel Caballero destacou que este novo certame “nace con vocación de permanencia” e será unha alternativa cultural e creativa de lecer especialmente pensada para a mocidade. O rexedor anunciou ademais que xa está prevista unha segunda edición no outono, concretamente os días 8 e 9 de novembro.
O evento contará con actuacións de escolas de danza, grupos de asociacións veciñais e compañías profesionais, ofrecendo unha mostra aberta de diferentes estilos e disciplinas coreográficas. Trátase dunha oportunidade única para moitos colectivos locais que, pola limitación económica, non tiñan acceso ata agora ao Auditorio Mar de Vigo.
Na presentación oficial participaron representantes de escolas como Dance Academy, Media Punta e New Era, así como a concelleira de Xuventude, María Lago, e Marta Díaz, presidenta de Coreomagazine, entidade promotora do festival. Díaz agradeceu o apoio institucional e subliñou o papel do festival como fomento de hábitos saudables, convivencia e espazos alternativos ao ocio dixital: “A danza pode ser un motivo para saír da casa e deixar as pantallas”.
O Vigo Dance Festival busca consolidarse como plataforma para dar visibilidade á excelente calidade dos grupos vigueses, ofrecendo un escenario profesional para compartir creacións e conectar coa cidadanía.