O Wake Up! encherá de música electrónica a Cidade da Cultura o 30 de agosto
A Cidade da Cultura de Galicia converterase o sábado 30 de agosto nun gran club ao aire libre coa chegada do Wake Up! en o Gaiás, un novo evento enmarcado nos Concertos do Xacobeo da Xunta de Galicia. A cita desenvolverase desde as 16.00 até as 06.00 horas, nunha maratón de música electrónica que traerá a Compostela a artistas de referencia internacional.
O cartel está encabezado polo DJ brasileiro Mochakk, unha das figuras máis destacadas do panorama actual, acompañado por Silvie Loto, Francisco Allendes, Cristina Lazic, Casta B2B Selles e MVRK.
Na presentación do evento, o director de Turismo de Galicia, Xosé Merelles, destacou que esta primeira edición do Wake Up! supón “un fito turístico destacado”, e puxo en valor a aposta do Goberno galego por posicionar Santiago como destino de grandes festivais e concertos de distintos xéneros musicais.
Merelles lembrou que os Concertos do Xacobeo están a contribuír ás boas cifras turísticas da capital galega, cun crecemento do 3 % no número de viaxeiros no primeiro semestre do ano, dos cales o 53 % son visitantes estranxeiros.
En total, a programación deste ano inclúe máis de 150 eventos en toda Galicia baixo a marca Concertos do Xacobeo, con máis de 800 artistas internacionais, estatais e galegos, que enchen de música os doce meses do ano e contribúen a descentralizar a oferta cultural e turística.
O programa completo pode consultarse en www.concertosdoxacobeo.gal