O XXII Rally Rías Altas de Regularidade reunirá este sábado en Guitiriz un total de 43 pilotos
A Escola Habanera de Guitiriz acolleu este xoves a presentación do XXII Rally Rías Altas de Regularidade, organizado pola Moto Club Coruña-Escudería Centollo e previsto para este sábado, 24 de outubro.
No acto participaron a alcaldesa de Guitiriz, Marisol Morandeira; o presidente da escudaría, Eduardo Iglesias; o vogal, Pablo Gómez; o socio, Samuel Campo; e Daniel Val, director de operacións do Iberik Gran Balneario de Guitiriz, entidade colaboradora na proba.
A edición deste ano contará con 43 pilotos inscritos e un formato que permite participar no percorrido de mañá, no de tarde ou na xornada completa. O rally pasará por 19 concellos das provincias da Coruña e Lugo, cun percorrido total de 288 quilómetros.
A modalidade de mañá sairá de O Burgo, en Culleredo, ás 9:00 horas. Para os participantes que realicen unicamente este tramo está previsto un xantar no restaurante La Casilla de Guitiriz.
Pola tarde, os vehículos sairán a partir das 16:00 horas desde a praza do Campo da Feira de Guitiriz. A chegada terá lugar no Iberik Gran Balneario de Guitiriz, en torno ás 21:30 horas, onde se celebrarán a entrega de premios e a cea de confraternización. Esta modalidade contará cunha clasificación independente da correspondente ao percorrido completo.
Na proba participarán vehículos clásicos fabricados antes do 31 de decembro de 1995, sempre que cumpran os requisitos técnicos e administrativos establecidos pola organización e a normativa de circulación vixente. O prazo de inscrición xa está pechado.
O Rally Rías Altas de Regularidade é un evento non deportivo para vehículos históricos que percorren estradas abertas ao tráfico. A velocidade media establecida será inferior aos 50 quilómetros por hora e os participantes deberán respectar en todo momento as normas de circulación.