Actualidade

O programa "Vive o Verán" desenvolverase durante o mes de xullo en 15 centros socioculturais de Santiago, con actividades lúdicas e educativas para crianzas nadas entre 2012 e 2020. A participación será de balde e o prazo de preinscrición estará aberto ata o 1 de xuño.

A concellaría de Centros Socioculturais, en colaboración co departamento de Medio Rural, lanza unha nova edición do programa "Vive o Verán", que ofrece preto de 400 prazas gratuítas para actividades infantís durante as mañás de xullo en 15 centros da cidade e do rural.

O obxectivo, segundo explicaron os concelleiros Xan Duro e Pilar Lueiro, é proporcionar un tempo de lecer enriquecedor, promovendo valores cívicos e culturais a través de experiencias inmersivas centradas en temáticas como a mitoloxía galega, a ecoloxía ou o cinema.

As actividades realizaranse en horario de 9:00 a 14:30 horas e están dirixidas a crianzas nadas entre 2012 e 2020. O prazo de preinscrición estará aberto desde o luns ata o 1 de xuño. No caso de haber máis solicitudes que prazas, realizarase un sorteo público o 11 de xuño. Ademais, as aulas de xogo permanecerán abertas en horario de mañá en varios centros, sen necesidade de inscrición previa.