Os datos da EPA do terceiro trimestre evidencian os graves problemas estruturais do mercado laboral galego
Cada ano, os datos da Enquisa de Poboación Activa (EPA) do terceiro trimestre —correspondente aos meses de xullo, agosto e setembro— reflicten unha mellora aparente no comportamento do mercado laboral galego, derivada do marcado carácter estacional do emprego, centrado en actividades ligadas ao turismo como a hostalaría e o comercio. Porén, ao analizar en detalle estes datos, obsérvanse graves problemas estruturais que seguen a afectar o mundo do traballo en Galicia: o avellentamento da poboación activa e o descenso da ocupación na industria e na construción, dous sectores con mellores condicións laborais e salariais.
En canto á poboación activa, o aumento rexistrado neste trimestre débese principalmente ás mulleres, mentres que entre os homes descende. Trátase maioritariamente de mulleres maiores de 45 anos, o que agrava un dos principais desequilibrios estruturais do mercado laboral: máis do 58 % da poboación activa supera os 45 anos de idade.
Ao mesmo tempo, a taxa de actividade galega é un 5,4 % inferior á media estatal, o que contribúe a manter o desemprego en niveis máis baixos que no conxunto do Estado. “O paro descende en Galiza por avellentamento da poboación e como consecuencia da emigración da xente nova e sobrecualificada para un mercado laboral precario como o noso”, advertiu o secretario confederal de Negociación Colectiva, Emprego e Industria da CIG, Paco Sío.
Os datos da EPA tamén amosan que, aínda que aumenta o número de persoas dispostas a traballar, a economía galega non é quen de xerar empregos ao ritmo necesario, o que provoca un incremento do paro feminino, especialmente nos sectores máis precarizados, marcados pola temporalidade e o tempo parcial.
Exceptuando un insignificante incremento do emprego no sector primario (apenas 100 persoas), todo o emprego xerado no terceiro trimestre concéntrase no sector servizos, e dentro del, nas actividades relacionadas co turismo.