Os datos da EPA evidencian que a precariedade e a parcialidade se ceban coas traballadoras galegas
A Enquisa de Poboación Activa (EPA) do segundo trimestre do ano revela que a precariedade e a parcialidade continúan afectando de forma notable ao mercado laboral galego, especialmente ás mulleres. Segundo os datos, o 76,7% das novas persoas ocupadas son mulleres e o 87,6% dos novos empregos concéntranse no sector servizos.
A maior parte das novas contratacións foron en xornadas parciais de entre 20 e 30 horas semanais, e ligadas a actividades con alta rotación, como o turismo, a hostalería, o comercio ou os servizos sociais. Esta tendencia reflíctese nun aumento das persoas asalariadas con contratos temporais (+5,2%) e nunha expansión do contrato fixo-descontinuo, que non garante estabilidade nin ingresos regulares.
O secretario confederal de Negociación Colectiva da CIG, Francisco González Sío, denunciou que “cada vez hai máis persoas con emprego que non poden cubrir as súas necesidades básicas” e alertou contra o discurso triunfalista do Goberno estatal. Para o sindicato nacionalista, a EPA volve evidenciar a necesidade dun cambio de modelo produtivo, dunha nova lexislación laboral e da recuperación dos dereitos laborais eliminados desde 2012.
Por sectores, a creación de emprego centrouse maioritariamente nos servizos (+13.500 ocupados), mentres que a industria (+800), a agricultura (+1.200) e a construción (-200) apenas rexistraron variacións. Pola súa banda, Galiza segue por baixo da media estatal en taxa de actividade (53,3% fronte ao 59%) e en taxa de ocupación (48,8% fronte ao 52,9%).
A CIG tamén alertou da falta de políticas activas da Xunta de Galicia para afrontar esta situación e da pasividade do Goberno de Rueda ante a emigración xuvenil e o envellecemento da poboación. “Necesitamos un marco galego de relacións laborais que permita xerar emprego de calidade e fixar poboación”, concluíu González Sío.