Os dous incendios de Rodeiro quedan estabilizados mentres segue activo o lume de Baltar
Os servizos de extinción conseguiron estabilizar os dous incendios forestais declarados este sábado no concello pontevedrés de Rodeiro, mentres continúa activo o lume que afecta desde onte á parroquia de Garabelos do Bouzo, no municipio ourensán de Baltar. Segundo os datos actualizados pola Consellería do Medio Rural ata as 09.30 horas deste domingo, este último incendio mantén unha superficie provisional de 95 hectáreas.
En Rodeiro, o incendio da parroquia de Arnego, iniciado ás 15.59 horas de onte, quedou estabilizado ás 00.50 horas. As estimacións provisionais apuntan a máis de 20 hectáreas afectadas. No operativo participaron ata o momento dez axentes, doce brigadas, oito motobombas, unha pa, catro helicópteros e dous avións.
A evolución tamén foi favorable en Carboentes, onde o lume declarado ás 16.03 horas do sábado quedou estabilizado ás 09.17 horas deste domingo. Neste caso, a superficie afectada supera igualmente as 20 hectáreas.
O dispositivo mobilizado en Carboentes foi reforzado ao longo das últimas horas e suma dous técnicos, dez axentes, trece brigadas, trece motobombas e unha pa, ademais de tres helicópteros e catro avións.
A maior superficie afectada continúa concentrándose en Baltar. O incendio de Garabelos do Bouzo, iniciado ás 12.21 horas do sábado, segue activo e alcanza unhas 95 hectáreas, de acordo coas últimas estimacións provisionais.
Os traballos de extinción neste punto mobilizaron un amplo operativo integrado por tres técnicos, doce axentes, 21 brigadas, trece motobombas, tres pas e unha unidade técnica de apoio. Por aire participaron seis helicópteros e nove avións.
Medio Rural lembra que o teléfono gratuíto 085 está dispoñible para comunicar a detección de incendios forestais. A cidadanía tamén pode utilizar a aplicación ALume para acceder a información sobre os lumes activos en Galicia.
Ademais, o número anónimo e gratuíto 900 815 085 permite denunciar posibles actividades incendiarias delituosas. A información actualizada sobre os incendios forestais que alcanzan ou superan as 20 hectáreas tamén se ofrece a través da conta @incendios085.