Actualidade

As novas tarifas de Vitrasa permitirán a gratuidade para menores de 15 anos grazas ás axudas do Goberno de España. O Concello de Vigo mantén tamén a gratuidade para as persoas pensionistas.

Desde este martes, 1 de xullo, comezan a aplicarse as novas tarifas do transporte público urbano de Vigo. O alcalde, Abel Caballero, anunciou que todos os menores de 15 anos poderán viaxar de balde grazas ás axudas ao transporte público implementadas polo Goberno de España.

Deste xeito, Vigo contará con dúas franxas de idade con acceso gratuíto ao bus urbano: a nova medida para a mocidade, financiada polo Estado, e a xa existente para pensionistas, financiada polo Concello.

Ademais, o alcalde destacou un novo recoñecemento ao HALO, que vén de recibir o V Premio ACHE de Enxeñería Estrutural na categoría de pasarelas no IX Congreso da Asociación Española de Enxeñería Estrutural. O premio destaca a calidade, a innovación e a importancia desta infraestrutura, que suma xa seis galardóns e se consolida como un símbolo arquitectónico da cidade.