Os Premios Martín Códax da Música volven contar co apoio da Xunta para difundir o talento galego
O director da Axencia Galega das Industrias Culturais, Jacobo Sutil, participou hoxe no anuncio da 12ª edición dos Premios Martín Códax da Música, para os que a asociación Músicas ao Vivo volve contar co apoio económico da Xunta de Galicia en recoñecemento á súa consolidación como plataforma de difusión do talento musical galego.
A sala Capitol de Santiago de Compostela acolleu a presentación da convocatoria de 2025, na que o público volverá ter un papel fundamental na elección dos proxectos premiados. Segundo os datos da organización, preto de 4.000 persoas participaron na rolda de votacións de 2024, ano no que por vez primeira se posibilitou esta participación externa.
O responsable de Industrias Culturais da Consellería de Cultura, Lingua e Mocidade interveu nesta presentación xunto á cantante Sheila Patricia, presidenta de Músicas ao Vivo; Tomás Díez, vocal da directiva, e unha representación do resto de institucións e empresas colaboradoras. Sutil felicitou a organización por esta nova convocatoria, que reafirma o papel dos Martín Códax como escaparate da diversidade e calidade da música galega, así como da industria que se desenvolve ao seu redor.
Inscricións ata o 23 de marzo
O calendario de actividades vinculadas aos Premios Martín Códax da Música arrincará o vindeiro 3 de marzo coa apertura do período de inscrición para bandas e artistas, que se prolongará ata o día 23. Nos últimos anos, veñen rexistrándose máis de 400 propostas nas 15 categorías musicais habilitadas en cada convocatoria.
Unha vez finalizado este prazo, o xurado profesional valorará as candidaturas nun proceso que se desenvolverá durante o mes de abril e do que sairán tres finalistas por apartado. Xa en maio, abriranse as votacións ao público e ás persoas asociadas a Músicas ao Vivo.
O 28 de maio daranse a coñecer os nomes das gañadoras e gañadores desta edición durante a gala de entrega, que se celebrará en Pontevedra e que, segundo adiantou a organización, terá unha estreita conexión co Día das Letras Galegas 2025, dedicado ás cantautoras e á poesía oral tradicional. No evento tamén se entregarán os premios Artista Emerxente e Organistrum para recoñecer salas, festivais e proxectos de comunicación e difusión musical.