Actualidade

Renfe confirma que os servizos ferroviarios en Galicia, incluído o Eixo Atlántico e a liña de Alta Velocidade, seguirán suspendidos ata novo aviso pola falta de tensión en Sanabria.

Galicia esperta case 20 horas despois do apagón que paralizou boa parte da actividade, especialmente no transporte ferroviario. A pesar de que algúns núcleos de Cercanías e liñas de Alta Velocidade están a recuperar progresivamente a normalidade noutras zonas do Estado, Renfe informou esta mañá que en Galicia os servizos continuarán suspendidos ata novo aviso.

Segundo o último comunicado do Ministerio de Transportes, os servizos afectados inclúen o Avant entre Ourense e A Coruña, así como os trens do Eixo Atlántico entre Vigo, Santiago e A Coruña. Tamén se mantén paralizada a circulación no Ancho Métrico entre Ferrol e Ortigueira e na liña de Alta Velocidade cara á Meseta, onde a falta de tensión a partir de Sanabria impide o paso de AVE, Avlo e Alvia cara a Madrid.

A situación afecta tamén aos trens diésel como o Celta, que conecta Vigo con Oporto, e aos servizos rexionais nas liñas convencionais.

Renfe anunciou que a recuperación dos servizos será progresiva ao longo da xornada, en función do restablecemento do subministro eléctrico nas liñas afectadas. Mentres tanto, os viaxeiros poderán solicitar a devolución ou o cambio dos seus billetes sen custo adicional a través dos canais oficiais da operadora.

Así mesmo, Renfe actualizará a información en tempo real nas súas redes sociais e na conta @InfoRenfe en X.