Eventos

A presentación celebrada na Coruña confirmou o regreso da cita de Boimorto os días 28, 29 e 30 de agosto cun cartel amplo, novas propostas interxeracionais e a mesma vocación solidaria que fixo do evento unha referencia do verán galego

O Festival da Luz 2026 xa botou a andar e fíxoo cunha carta de presentación que reforza a súa condición de cita singular dentro do calendario musical galego. A posta de longo celebrada na Fundación Paideia, na Coruña, serviu para adiantar boa parte do cartel da edición do 15 aniversario e para confirmar que Boimorto volverá converterse durante tres días nun punto de encontro entre música, solidariedade e mundo rural.

Á cabeza da nova colleita figuran Pablo Alborán, Nena Daconte e Chambao, nun avance artístico ao que se suman tamén nomes como La Bien Querida, Ráfaga, Cómplices, Repion, Boikot, Luar na Lubre, Treixadura ou Budiño. O festival mantén así unha fórmula que mestura artistas moi recoñecibles co peso da música galega e cunha programación pensada para públicos distintos, unha das claves que lle permitiron consolidar unha identidade propia ao longo destes anos.

A edición de 2026 manterá ademais o perfil solidario que acompaña ao evento desde a súa orixe. Segundo se explicou na presentación, a recadación desta nova edición irá destinada a COGAMI, mentres que o encontro tamén quixo lembrar o balance da última convocatoria, na que se reuniron 115.000 euros para apoiar á Cruz Vermella, á Federación de Sociedades Musicais da Comunidade Valenciana e a proxectos locais de Boimorto.

Xunto ao cartel, o festival incorporará como novidade campamentos de verán interxeracionais nos que participarán nenos da comarca e persoas maiores, acompañados por artistas emerxentes de música tradicional, para rematar subindo ao escenario durante o propio evento. A proposta reforza a idea dun festival que quere ir máis alá dos concertos e seguir ligado á vida da contorna, cun modelo que combina cultura, convivencia e dinamización rural