Pastoriza acolle este sábado un torneo triangular de fútbol sala feminino con equipos de Primeira
Pastoriza acollerá este sábado, 26 de setembro, un torneo triangular de fútbol sala feminino coa participación de tres equipos da Primeira División: o FSF Castro, o Rodiles FS e o Estrela Verín. A xornada, organizada polo Concello de Pastoriza coa colaboración da Asociación de Comerciantes e Empresarios de Pastoriza e da UD Pastoricense, converterá o Pavillón Municipal nun punto de encontro para as persoas afeccionadas ao fútbol sala.
Na presentación da actividade participaron o alcalde, Darío Cabaneiro; o tenente de alcalde, Marcos García; a concelleira de Deportes, Fina Méndez, e José Manuel García, da Asociación de Comerciantes e Empresarios de Pastoriza. A entrada será gratuíta e a organización prevé unha elevada asistencia ao recinto, que conta con capacidade para 150 persoas.
O torneo disputarase en formato triangular, polo que cada equipo xogará dous encontros. A primeira cita será ás 11:30 horas, co partido entre o Rodiles FS e o FSF Castro. Ás 12:30 horas enfrontaranse o Estrela Verín e o Rodiles FS, mentres que ás 13:30 horas pecharán a competición o FSF Castro e o Estrela Verín.
A clasificación determinarase por puntos, con tres por cada vitoria, un polo empate e ningún pola derrota. En caso de igualdade, terá en conta a diferenza entre os goles marcados e os encaixados. Ao remate da xornada entregaranse trofeos aos tres primeiros clasificados.
Entre as xogadoras participantes estará Antía Pérez, do FSF Castro, internacional coa selección española, o que engade un atractivo máis a unha competición que supón a primeira ocasión na que Pastoriza recibe equipos da máxima categoría estatal.
A iniciativa busca achegar o deporte feminino á veciñanza, fomentar a práctica deportiva e dar maior visibilidade ao fútbol sala entre as nenas e mozas do municipio. A presenza da UD Pastoricense, que conta actualmente con catro equipos, dous deles de fútbol sala feminino e masculino en 1ª Futgal, reforza a vinculación do torneo co deporte local.
A organización destaca tamén o traballo desenvolvido para facer posible esta primeira edición, coa coordinación cos equipos participantes a través de Julio Delgado, adestrador do FSF Castro. A intención do Concello é dar continuidade ao torneo en vindeiras edicións, aínda que recoñece que este tipo de eventos require un importante esforzo de coordinación.
A celebración da competición forma parte da aposta municipal por converter Pastoriza nunha sede de eventos deportivos. Durante o verán, o municipio xa acolleu un torneo de fútbol sala no que participaron 24 equipos.
Durante a xornada tamén haberá servizo de bar e un sorteo de dúas camisetas da UD Pastoricense e do FSF Castro, unha actividade que contará coa colaboración da comisión do Entroido 2027. O Concello agradece a implicación do persoal municipal e das persoas que colaboran na organización, así como da Asociación de Comerciantes e Empresarios de Pastoriza, da UD Pastoricense e de BigMat Huertas, como patrocinador oficial.