Actualidade

O delegado do Goberno fixo balance dos seus dous anos no cargo, salientando os avances en dereitos, benestar e infraestruturas, e asegurou que “isto non se para”.

O delegado do Goberno en Galicia, Pedro Branco, renovou este luns na Coruña o seu compromiso de continuar traballando durante os dous anos que restan de lexislatura para que Galicia “logre o mellor rédito do momento que está a vivir España”.

Durante un almorzo informativo celebrado na sede da Delegación do Goberno, Branco fixo balance dos seus dous anos no cargo, destacando os avances en dereitos, a consolidación do Estado do Benestar, os investimentos históricos e o desbloqueo de grandes infraestruturas.

Reivindicou a acción do Executivo de Pedro Sánchez, “o máis progresista da historia”, e asegurou que “o Goberno de España foi e é o mellor para Galicia”, con máis de 4.000 millóns de euros investidos a través do Plan de Recuperación, as maiores transferencias a Xunta e concellos e a reactivación de proxectos clave en estradas, ferrocarrís, portos e aeroportos.

Subliñou que “somos un Goberno de Acción, que non se conforma”, anunciando que seguirán chegando plans como os de vivenda, saúde visual infantil, saúde mental e a futura Lei de Familias. Tamén fixo referencia ao impulso de infraestruturas como a autovía Santiago-Lugo ou as estacións intermodais.

Pedro Branco recoñeceu o traballo das subdelegadas e subdelegados provinciais e asegurou que manterá unha Delegación “de portas abertas” ao servizo da cidadanía galega.