Persoas xubiladas e pensionistas da CIG mobilízanse pola situación crítica do Servizo de Axuda no Fogar
O colectivo de persoas xubiladas e pensionistas da CIG concentrouse esta mañá diante dos concellos de Arteixo, Narón, Teo, Monforte, O Carballiño, Vilagarcía e Ponteareas para reclamar a xestión pública directa do Servizo de Axuda no Fogar (SAF) por parte da Xunta de Galiza. Denuncian unha situación insostible debido á falta de persoal, financiamento insuficiente e condicións laborais precarias.
Advirten que os tempos de espera para a prestación da dependencia poden superar o ano, agravándose a situación pola precariedade do SAF actual. O colectivo demanda que a Xunta asuma directamente este servizo, garantindo persoal suficiente, condicións dignas e un financiamento axeitado.
A CIG propón a creación dun Sistema Público Galego de Servizos de Atención ás Persoas que permita unha atención digna, equitativa e de calidade para toda a cidadanía galega.