Picusa Academy chega como líder por partida dobre á última proba da Copa de España Júnior
Picusa Academy afrontará este mércores a última carreira da Copa de España Júnior como líder tanto da clasificación individual como da clasificación por equipos. A formación con sede en Mos asegurou matematicamente o primeiro posto por escuadras e Hugo Muñoz fíxose co liderado individual tras a súa actuación no XVI Trofeo Ayuntamiento de Peñafiel-Ruta del Vino Ribera del Duero, disputado este domingo.
A proba de Peñafiel, oitava cita puntuable da tempada, resultou especialmente favorable para o conxunto galego, que se impuxo na clasificación por equipos. Ademais, o segundo posto de Hugo Muñoz permitiulle superar na xeral a Darío Gimeno, do Baqué Movistar Team, que defendía o liderado e terminou no posto 19.
Muñoz comezara a xornada a só un punto do primeiro clasificado e agora conta cunha vantaxe de 45 puntos á fronte da xeral individual.
O resultado foi posible grazas á estratexia colectiva de Picusa Academy desde os primeiros quilómetros dos 140 que completaban o percorrido pola comarca da Ribera del Duero. O equipo galego aproveitou o vento lateral para formar abanicos e conseguiu situar a varios dos seus corredores no grupo de cabeza, mentres Darío Gimeno quedaba fóra dese corte.
Hugo Muñoz rodou no grupo dianteiro xunto con cinco compañeiros e tamén pasou en primeira posición polos dous altos puntuables da carreira, o que lle permitiu facerse coa clasificación da Montaña.
O ciclista, que competía na súa provincia, integrou posteriormente o cuarteto que se destacou no tramo final da proba para disputar a vitoria na chegada ao Castelo de Peñafiel. Asier Fortea, do Lucta, foi o máis rápido ao sprint e logrou o triunfo, por diante de Hugo Muñoz. Diego Rodríguez, do Sidra Menéndez, completou o podio.
O grupo perseguidor entrou na meta medio minuto máis tarde. O triunfo por equipos de Picusa Academy quedou certificado grazas ás posicións de Rodrigo García, décimo, e Lucas Blanco, undécimo.
O primeiro posto por escuadras permitiu ademais que Picusa Academy asegurase matematicamente a clasificación xeral por equipos da Copa de España Júnior. O proxecto galego, posto en marcha en 2024, suma así o seu segundo título nesta categoría.
Agora, a formación de Mos aspira a completar o dobrete coa súa primeira vitoria na clasificación individual. A última oportunidade chegará este mércores no V Trofeo Júnior Moixent, en Valencia, unha carreira de 126 quilómetros que pechará o calendario da Copa de España Júnior e determinará a clasificación definitiva.