Pontevedra conclúe a recuperación integral da senda dos pescadores do Lérez
O Concello de Pontevedra vén de rematar a recuperación integral da senda dos pescadores que une a praia fluvial de Couso coa Illa do Covo, no río Lérez. O concelleiro de Servizos Urbanos Básicos, Xaquín Moreda, visitou este venres a zona para comprobar o resultado das actuacións, que xa están operativas desde finais de xullo.
O proxecto contou cun investimento de 32.115,69 euros e tivo como obxectivo reparar os danos provocados polas enchentes da primavera, empregando técnicas respectuosas co medio natural e aproveitando os recursos da contorna.
As intervencións incluíron:
Recuperación do areal de Couso, retirando parte dos camiños próximos ao río para devolverlle espazo á praia e acondicionando un trazado alternativo máis afastado da auga para manter a accesibilidade.
Reparación da pasarela de madeira desprazada polas enchentes, coa construción dun paso inundable para protexer a estrutura en épocas de crecida.
Mellora da seguridade, coa rehabilitación dunha escaleira, instalación de novos chanzos e dunha varanda.
Acondicionamento da senda entre a ponte verde e a Illa do Covo, incluíndo un novo paso e unha pequena pasarela para salvar un desnivel.
Moreda destacou que “o obxectivo era devolver este espazo de gran valor natural á cidadanía nas mellores condicións, garantindo a seguridade e respectando a contorna”. Lembrou tamén que esta senda, como a da outra marxe do Lérez, serve como espazo de lecer e refuxio climático nos días de altas temperaturas.