Pontevedra convértese no epicentro da banda deseñada coa terceira edición de Bdra Gráfica
A cidade de Pontevedra xa está lista para acoller a terceira edición de Bdra Gráfica, o festival de banda deseñada que se celebrará do 22 ao 25 de maio. Toda a programación pode consultarse na web oficial do evento: www.bdragrafica.gal. A gran carpa da Ferraría será, unha vez máis, o corazón da actividade, acollendo a feira de cómic con 24 casetas de librarías e editoriais, sinaturas de libros, charlas e obradoiros.
Nesta edición participarán 24 autores e autoras, entre os que destacan Aldara Prado, Javi Rodríguez, Miguelanxo Prado, Teresa Valero ou Rubén Pellejero, este último homenaxeado co Premio Bdra Gráfica pola súa traxectoria e actual responsable das aventuras de Corto Maltés.
As exposicións ocuparán espazos emblemáticos da cidade. Na Fundación Moldes abrirase a mostra dedicada a Corto Maltés o xoves 22 ás 18.00 h. Na Casa Consistorial, “Historia da BD en 40 orixinais” ofrecerá un percorrido histórico comisariado por Jaume Vaquer. O paseo de Odriozola acollerá “A idea do cómic”, centrada nos procesos creativos. A autora Teresa Valero protagoniza unha mostra na galería Nemonon sobre o proceso de creación da nova entrega de Contrapaso, con encontro previsto o venres 23 ás 19.30 h.
No eido audiovisual, o Teatro Principal proxectará “Mafalda” e “Corto Maltés” o venres 23, e “Muerte de un ciclista” o mércores 28, vinculada á temática da nova obra de Valero. Tamén haberá charlas profesionais con Miguelanxo Prado e Alicia Jaraba, e revisións de proxectos.
A programación completa inclúe tamén actividades formativas, presentacións de libros, conversas con autoras e autores e múltiples propostas para público de todas as idades.