Pontevedra convértese no epicentro do salvamento acuático coa celebración do Campionato de España
O Campionato de España de Salvamento e Socorrismo por Comunidades Autónomas celebrarase entre o 26 e o 28 de setembro, convertendo a Pontevedra no epicentro estatal desta disciplina. As probas de piscina desenvolveranse na Fundación Rías do Sur, mentres que as de praia terán lugar en Silgar, no municipio de Sanxenxo.
A cita reunirá a arredor de 114 socorristas en categoría absoluta e 90 en categoría cadete, procedentes de dez comunidades autónomas. Galicia será a delegación con maior representación, ao presentar o máximo de deportistas posible.
Na presentación do campionato, a concelleira de Deportes, Anabel Gulías, destacou que este evento “culmina o compromiso firme do goberno municipal cos clubs de auga da cidade”. A edil puxo en valor o convenio coa Fundación Rías do Sur para garantir a dispoñibilidade de lámina de auga e agradeceu especialmente o traballo do club local SAPO, clave para traer a Pontevedra competicións de alto nivel.
“As boas marcas do club demostran que cando todos e todas remamos, somos capaces de conseguir isto”, subliñou Gulías, lembrando que xa no campionato galego celebrado o ano pasado se anunciaba que “virían máis cousas, e aquí estamos cun campionato de España”.
A edil tamén agradeceu o apoio da Xunta de Galicia, da Deputación de Pontevedra e das Federacións Galega e Española de Salvamento e Socorrismo. Ademais de destacar o seu valor deportivo, incidiu no compoñente formativo e de prevención desta disciplina, que prepara aos socorristas para rescates eficaces e que, segundo sinalou, é “un deporte divertidísimo e moi estético” que mesmo aspira a converterse en olímpico.