Pontevedra impulsa obras e licitacións por máis de 7,5 millóns de euros para avanzar na planificación municipal
O Concello de Pontevedra deu un novo impulso á súa planificación municipal cun conxunto de adxudicacións de obras e licitacións que superan os 7,5 millóns de euros, segundo informou a alcaldesa en funcións, Eva Vilaverde.
A responsable municipal destacou que estas actuacións demostran que os proxectos anunciados para este ano están en marcha: “Estamos traballando para sacar adiante o antes posible todo o que anunciou o alcalde a finais do ano pasado”.
Adxudicacións de obras en distintas zonas da cidade
Entre os expedientes aprobados destaca a reforma da rúa Casimiro Gómez, adxudicada á empresa E.C. Casas por preto de 948.000 euros e cun prazo de execución de 12 meses.
A actuación incluirá a mellora das redes soterradas, especialmente o abastecemento de auga, e permitirá ampliar os espazos peonís e renovar a iluminación para favorecer a convivencia na rúa.
Tamén se adxudicaron obras en Outeiro (Lérez) e na rúa das Pereiras, cun investimento conxunto superior aos 440.000 euros e un prazo de execución de catro meses en ambos casos.
Novo contrato para o vestiario municipal
A Xunta de Goberno aprobou ademais a adxudicación do contrato de vestiario laboral municipal á empresa Peykar, por máis de 428.000 euros e cunha duración de catro anos.
Segundo explicou Vilaverde, trátase dun contrato marco que unifica por primeira vez o subministro de uniformidade para todos os servizos municipais, agás os de emerxencias.
Macrocontrato de pavimentación por 5,5 millóns
Un dos principais proxectos en marcha é o contrato de pavimentación da rede viaria municipal, valorado en case 5,5 millóns de euros e dividido en catro lotes.
Ao proceso presentáronse cinco empresas, que optan a executar melloras en vías urbanas, periurbanas, rurais e en polígonos empresariais.
A alcaldesa en funcións subliñou que este contrato permitirá unha renovación xeral do viario: “Toda a cidade vai sufrir unha mellora evidente”.
Estudo do mercado da vivenda e novas licitacións
O Concello tamén abriu o proceso para contratar un estudo do mercado residencial, co obxectivo de analizar a situación da vivenda en Pontevedra, incluíndo alugueiro, compravenda e zonas tensionadas.
Ademais, iniciouse a licitación do servizo de supervisión das atraccións de feira para festas como o Santiaguiño e a Peregrina, cun orzamento de máis de 118.000 euros para catro anos.