Pontevedra investirá 236.000 euros na consolidación e posta en valor dos arcos medievais da Ponte do Burgo
Extracto (galego)
O Concello de Pontevedra impulsará unha actuación de consolidación estrutural e intervención arqueolóxica nos arcos medievais da Ponte do Burgo cun investimento de máis de 236.000 euros. O proxecto foi presentado polo concelleiro de Patrimonio Histórico, Alberto Oubiña.
Extracto (castelán)
El Ayuntamiento de Pontevedra impulsará una actuación de consolidación estructural e intervención arqueológica en los arcos medievales del Ponte do Burgo con una inversión de más de 236.000 euros. El proyecto fue presentado por el concejal de Patrimonio Histórico, Alberto Oubiña.
Texto completo (galego)
O Concello de Pontevedra proxecta unha intervención estrutural e arqueolóxica para consolidar e poñer en valor os arcos medievais da Ponte do Burgo situados na praza de Valentín García Escudero.
O proxecto foi presentado polo concelleiro de Patrimonio Histórico, Alberto Oubiña, e conta cun orzamento total de 236.274 euros.
Consolidación estrutural dos arcos
A actuación centrarase na estabilización dos arcos número 14 e 15, que presentan problemas de inestabilidade estrutural e unha forte erosión nos morteiros, agravada pola humidade e pola proximidade da auga salgada da ría.
Para solucionar estes problemas retirarase o sistema actual de puntais e instalaranse novas doelas de granito que permitirán que os arcos funcionen estruturalmente por si mesmos. Estas novas pezas distinguiranse das orixinais para facilitar á cidadanía a identificación das partes restauradas.
Ademais, empregaránse morteiros transpirables e compatibles co granito histórico, co obxectivo de protexer os materiais orixinais e garantir a conservación do conxunto patrimonial.
Intervención arqueolóxica e difusión histórica
A obra combinará traballos de enxeñería civil e arqueoloxía e realizarase con especial coidado para preservar os restos históricos.
Durante a intervención instalarase un guindastre de 24 metros e procederase a unha limpeza manual exhaustiva da zona, así como a novas escavacións arqueolóxicas por fases. O Concello non descarta a aparición de novos achados históricos durante estes traballos.
Para mellorar a visibilidade do enclave eliminarase o actual peche de malla e instalarase unha varanda baixa que permitirá observar directamente os restos. Tamén se colocarán atrís informativos con infografías que explicarán a evolución histórica da ponte, do antigo porto e da muralla de Pontevedra desde a Idade Media.
Visitas guiadas e calendario da obra
O Concello prevé abrir este espazo arqueolóxico á cidadanía mediante visitas guiadas, tanto ao finalizar as obras como, na medida do posible, durante o propio proceso de intervención.
O prazo estimado de execución das obras será de seis meses desde a súa contratación. Neste momento, o goberno local está á espera do informe favorable da Dirección Xeral de Patrimonio Cultural de Galicia para poder iniciar o proceso de licitación.
Alberto Oubiña destacou que esta actuación se desenvolverá nun dos puntos máis importantes da memoria histórica da cidade e subliñou que este espazo constitúe “un testemuño físico da orixe de Pontevedra”.