Actualidade

O Concello de Pontevedra licita un investimento de 5,49 millóns de euros para rehabilitar máis de 191.000 m² de viarios en todo o municipio, nun proxecto dividido en catro lotes e cun prazo de execución de seis meses e medio.

O alcalde de Pontevedra, Miguel Anxo Fernández Lores, anunciou hoxe que a Xunta de Goberno Local aprobou a licitación do maior contrato de rehabilitación de firmes da historia do municipio. O investimento total ascende a 5.494.531 euros e permitirá actuar sobre 191.304,5 metros cadrados de viarios, unha superficie equivalente a 28 campos de fútbol.

O rexedor subliñou que esta actuación responde ao compromiso do mandato de reforzar o mantemento dos espazos públicos e do mobiliario urbano, e destacou que o proxecto abrangue todo o termo municipal mediante unha estrutura dividida en catro lotes principais:

Zona Urbana Centro (L1): 49.977,3 m² e 1.374.393 euros de investimento.

Zona Urbana Exterior / Barrios (L2): 46.663,7 m² e 1.373.452 euros.

Zona Urbana Parques Empresariais (L3): 43.806,3 m² e 1.372.605 euros, incluíndo a totalidade dos viarios do Parque do Bao e do Parque do Campiño.

Zona Non Urbana / Parroquias (L4): 50.857,2 m² e 1.374.081 euros.

A licitación xa está en marcha e, unha vez se produza a adxudicación, o prazo previsto de execución será de seis meses e medio. O Concello considera esta intervención clave para mellorar a seguridade viaria, renovar asfaltados deteriorados e avanzar nun modelo urbano máis coidado e accesible para toda a cidadanía.