Pontón exixe a dimisión de Rueda pola peor xestión dunha vaga de lumes na historia de Galiza
A portavoz nacional do BNG, Ana Pontón, cualificou como unha auténtica catástrofe ambiental, social e económica a vaga de lumes que arrasou Galiza desde o pasado 8 de agosto, con máis de 162.000 hectáreas queimadas, segundo os datos do satélite Copernicus. Os incendios provocaron tamén milleiros de persoas desaloxadas, 180 casas destruídas e centos de explotacións agrogandeiras e forestais afectadas.
Pontón comezou a súa intervención trasladando a súa solidariedade ás persoas que viviron con angustia a ameaza do lume nas súas casas, así como ás brigadas e veciñanza que se mobilizaron para salvar aldeas enteiras. Lembrou igualmente aos tres brigadistas hospitalizados, aos que desexou unha pronta recuperación.
A líder nacionalista foi contundente: “Estamos ante a maior vaga de incendios da nosa historia e ante a peor xestión dun Goberno que fallou estrepitosamente”.
Entre os fallos que atribuíu ao presidente Rueda, Pontón destacou:
Na prevención, por deixar sen executar 11 millóns de euros en 2025 para actuacións clave, incluídas franxas de protección en zonas de alto risco.
Na política rural, por permitir que avance o despoboamento e o abandono, especialmente en provincias como Ourense.
Na xestión da crise, por chegar tarde, con operativos incompletos, motobombas paralizadas, prazas sen cubrir e ordes contraditorias.
Na transparencia, por ocultar datos e minimizar a superficie afectada respecto do que indican os satélites, ademais de agochar lumes como o de Pena Trevinca.
Pontón denunciou que, mentres milleiros de persoas se enfrontaban soas ao lume, Rueda asistía a actos de partido, e acusou ao PP de recorrer unha vez máis á mentira para tapar responsabilidades: “Fixérono co Prestige, con Angrois, e agora volven facelo cos incendios”.
Finalmente, concluíu que Galiza queda arrasada polos lumes e polo fume, pero tamén pola indignación social ante un presidente que perdeu toda lexitimidade: “Só hai unha resposta posible: a responsabilidade política. Rueda debe dimitir xa”.