Preto de 500.000 persoas visitaron en 2025 o Parque Nacional das Illas Atlánticass, con récord histórico na de Cortegada
Preto de 500.000 persoas visitaron en 2025 o Parque Nacional marítimo-terrestre das Illas Atlánticas de Galicia, consolidando este espazo protexido como un dos principais referentes do turismo de natureza da comunidade. As illas Cíes volveron ser, un ano máis, o arquipélago máis visitado, concentrando case o 66 % do total de visitantes, mentres que Cortegada pechou o exercicio cun récord histórico de afluencia, ao superar por primeira vez a barreira das 10.000 persoas.
En cifras concretas, 323.357 persoas visitaron as Cíes, un balance lixeiramente inferior ao de 2024. Pola súa banda, Ons mantivo unha afluencia moi similar á do ano anterior, con 142.309 visitantes, mentres que Sálvora rexistrou 14.634 visitas e Cortegada acadou as 10.588, duplicando o número de visitantes rexistrados desde o ano 2021.
A análise mensual reflicte que a tempada alta estival, comprendida entre o 15 de maio e o 15 de setembro, volveu concentrar o maior volume de visitas. Agosto foi, como é habitual, o mes con máis afluencia, con 163.654 persoas, seguido de xullo (132.751) e xuño (82.719).
Cómpre salientar tamén o bo comportamento da afluencia durante a Semana Santa, cun total de 13.784 visitantes no mes de abril, fronte aos 11.570 do ano anterior, así como o incremento xeralizado rexistrado nos meses de maio, xuño e outubro.
Desde a Consellería de Medio Ambiente e Cambio Climático, responsable da xestión do parque, destacan o traballo continuado para desestacionalizar as visitas e para dar maior visibilidade ás illas de Sálvora e Cortegada, fomentando un coñecemento máis equilibrado dos catro arquipélagos.
Esta estratexia concrétase en iniciativas como actividades educativas, accións de voluntariado ambiental e visitas guiadas gratuítas, que se desenvolven ao longo de todo o ano fóra da tempada estival.
Ademais, a Xunta reforza a divulgación dos valores naturais e histórico-culturais do parque a través do Centro de visitantes do Parque Nacional en Vigo (Edificio Cambón), onde durante 2025 máis de 4.500 persoas participaron en charlas, obradoiros e actividades formativas, tanto alumnado de centros educativos como cidadanía en xeral.