Asociacións

A terceira edición do evento celebrarase en abril no campo de fútbol Manolo Barreiro e contará coa participación de 16 equipos amateurs e influencers do ámbito deportivo

O vicepresidente da Deputación de Pontevedra, Rafa Domínguez, presentou esta tarde no Museo de Pontevedra o Torneo do Ano 2025, un evento solidario organizado a favor da Asociación Española Contra o Cancro.

Esta será a terceira edición do torneo, que se disputará en abril no campo de fútbol Manolo Barreiro. Na competición participarán 16 equipos amateurs, e contará coa presenza de influencers do ámbito deportivo. Ademais, o evento retransmitirase a través da canle de Twitch de Javier Domínguez, organizador do torneo.

Durante a presentación, Domínguez destacou a importancia deste tipo de iniciativas solidarias para apoiar a investigación e a loita contra o cancro. “O noso obxectivo é contribuír a superar o 70% de supervivencia ao cancro no ano 2030. Quero agradecer a todos os organizadores e implicados o seu esforzo e compromiso para concienciar sobre a loita contra o cancro a través do deporte, que é fundamental para construír sociedades máis saudables”, sinalou.