Medio ambiente

A actuación foi realizada por axentes ambientais da Xunta e integrantes de Vaipolorío despois de que o colectivo alertase da mortaldade de peixes provocada pola falta de auga

A asociación ecoloxista Vaipolorío alertou este luns, 17 de agosto, da mortaldade de peixes que se estaba producindo en distintos tramos do río dos Gafos debido á escaseza de auga.

Tras detectar a situación, o colectivo trasladou a alerta á Xefatura Territorial de Medio Ambiente de Pontevedra para solicitar unha reubicación provisional dos exemplares vivos co obxectivo de garantir a súa supervivencia.

Este martes, axentes ambientais deste departamento autonómico desprazáronse ata o río para realizar a actuación, acompañados por integrantes de Vaipolorío. Os traballos desenvolvéronse no tramo medio-alto do río Toxal, Tomeza e Gafos.

Durante a intervención recuperáronse exemplares de escalo, troita e anguía, que posteriormente foron trasladados a zonas con condicións máis favorables para a súa supervivencia.

Segundo as estimacións realizadas, a actuación permitiu recuperar e reubicar preto de 500 exemplares de peixes afectados pola falta de auga no río.